ಮಂಗಳೂರು: ನಗರ ಪೊಲೀಸ್‌ ಕಮಿಷನರೇಟ್‌ ವ್ಯಾಪ್ತಿಯಲ್ಲಿ 2026ರ ಜನವರಿಯಿಂದ ಜೂನ್‌ 30ರ ವರೆಗೆ ಕೇವಲ 6 ತಿಂಗಳಲ್ಲಿ 136 ಮಂದಿ ನಾಪತ್ತೆಯಾಗಿದ್ದಾರೆ. ಇವರಲ್ಲಿ 106 ಮಂದಿ ಪತ್ತೆಯಾದರೆ ಇನ್ನೂ 30 ಮಂದಿಯ ಬಗ್ಗೆ ಯಾವುದೇ ಸುಳಿವು ಸಿಕ್ಕಿಲ್ಲ.
ನಾಪತ್ತೆಯಾದ 64 ಮಂದಿ ಗಂಡಸರಲ್ಲಿ 44 ಮಂದಿ ಪತ್ತೆಯಾದರೆ 20 ಮಂದಿ ಇನ್ನೂ ಪತ್ತೆಯಾಗಿಲ್ಲ. ಮಹಿಳೆಯರಲ್ಲಿ 44 ಮಂದಿ ನಾಪತ್ತೆಯಾದರೆ, 38 ಮಂದಿ ಪತ್ತೆಯಾಗಿದ್ದು, 6 ಮಂದಿ ಸುಳಿವಿಲ್ಲ. 5 ಮಂದಿ ಯುವಕರಲ್ಲಿ ಐವರೂ ಮಂದಿ ಪತ್ತೆಯಾದರೆ, 23 ಯುವತಿಯರಲ್ಲಿ 19 ಮಂದಿ ಪತ್ತೆಯಾದರೆ, ನಾಲ್ವರು ಇನ್ನೂ ಪತ್ತೆಯಾಗಿಲ್ಲ.
ನಾಪತ್ತೆಯ ಹಿಂದಿನ ಕಾರಣ
ಪ್ರೀತಿ ಸಂಬಂಧ, ಅಪ್ರಬುದ್ಧತೆ, ಉದ್ಯೋಗ, ಅಕ್ರಮ ಸಂಬಂಧ , ಕುಟುಂಬ ಕಲಹ, ಮಾನಸಿಕ ಒತ್ತಡ, ಆರ್ಥಿಕ ಸಮಸ್ಯೆ, ಲೈಂಗಿಕ ಶೋಷಣೆ, ಅನಾರೋಗ್ಯ ಸಮಸ್ಯೆಗಳು ನಾಪತ್ತೆಯ ಪ್ರಮುಖ ಕಾರಣವಾಗಿವೆ ಎನ್ನುವುದು ಪೊಲೀಸ್‌ ವಿಚಾರಣೆ, ದಾಖಲಾದ ಪ್ರಕರಣಗಳ ಮಾಹಿತಿಯಲ್ಲಿ ಸ್ಪಷ್ಟವಾಗಿದೆ.
ಹೊರ ಜಿಲ್ಲೆಯ ಮಹಿಳೆಯರು ಅಧಿಕ
ನಾಪತ್ತೆಯಾದ ಪ್ರಕರಣಗಳಲ್ಲಿ ಹೊರಜಿಲ್ಲೆಯವರು ಹೆಚ್ಚಿನ ಸಂಖ್ಯೆಯಲ್ಲಿದ್ದಾರೆ. ಕಟ್ಟಡ, ಮನೆ ಕೆಲಸ, ಗಾರೆ ಕೆಲಸ ಅಥವಾ ಇನ್ಯಾವುದೇ ಕಾರಣಕ್ಕೆ ಹೊರ ಜಿಲ್ಲೆಯಿಂದ ಬಂದಂತಹ ಯುವತಿಯರು, ನಾಪತ್ತೆಯಾಗುತ್ತಿರುವ ಸಂಖ್ಯೆ ಹೆಚ್ಚಿದೆ. ಇವರ ನಾಪತ್ತೆಗೆ ಸಾಮಾಜಿಕ ಜಾಲತಾಣದ ನಂಟು, ಅಕ್ರಮ ಸಂಬಂಧಗಳು ಕಾರಣ ಎನ್ನುತ್ತಾರೆ ಹಿರಿಯ ಅಧಿಕಾರಿಗಳು.