ಮಂಗಳೂರು ಜೈಲಿನೊಳಗೆ ಗಾಂಜಾ ಎಸೆಯಲು ಯತ್ನಿಸಿದವನ ಬಂಧನ: ಸೂಚನೆ ನೀಡಿದ್ದ ವಿಚಾರಣಾಧೀನ ಕೈದಿಯ ಬಳಿಯಿದ್ದ ಮೊಬೈಲ್ ಜಪ್ತಿ!

ಮಂಗಳೂರು ಕಾರಾಗೃಹದೊಳಗೆ ಜುಲೈ 2 ರ ಮುಂಜಾನೆ 4.20 ರ ಸುಮಾರಿಗೆ ಗಾಂಜಾ ಎಸೆಯಲು ಯತ್ನಿಸಿದ ತಿಲಕರಾಜ್ ಎಂಬ ಆರೋಪಿಯನ್ನು ಕೆಎಸ್‌ಐಎಸ್‌ಎಫ್ ಸಿಬ್ಬಂದಿ ಬೆನ್ನಟ್ಟಿ ಹಿಡಿದಿದ್ದಾರೆ. ವಿಚಾರಣೆ ವೇಳೆ ಮೂಡುಶೆಡ್ಡೆಯ ಕಿರಣ್ ಎಂಬಾತ ನೀಡಿದ 2 ಸಾವಿರ ರೂ. ಹಾಗೂ ಜೈಲಿನೊಳಗಿರುವ ವಿಚಾರಣಾಧೀನ ಕೈದಿ ಲಾಯ್ ವೇಗಸ್ ನೀಡಿದ ಮೊಬೈಲ್ ಸೂಚನೆಯಂತೆ ತಾನು ಗಾಂಜಾ ಮತ್ತು ಲೈಟರ್ ಅನ್ನು ಜೈಲಿನ ಅಡುಗೆ ಕೋಣೆಯತ್ತ ಎಸೆದಿರುವುದಾಗಿ ಆರೋಪಿ ಒಪ್ಪಿಕೊಂಡಿದ್ದಾನೆ. ಈ ಮಾಹಿತಿಯ ಆಧಾರದ ಮೇಲೆ ಪೊಲೀಸರು ಕೈದಿಯ ಬಳಿಯಿದ್ದ ಮೊಬೈಲ್‌ ವಶಪಡಿಸಿಕೊಂಡು ಇಬ್ಬರ ಮೇಲೂ ಪ್ರಕರಣ ದಾಖಲಿಸಿದ್ದಾರೆ.

ಮಂಗಳೂರು: ಮಂಗಳೂರು ನಗರ ಜನತೆ ಗಾಢ ನಿದ್ದೆಯಲ್ಲಿರುವ ಹೊತ್ತು. ಆದರೆ ಗಾಂಜಾ ಸಾಗಾಟ ಮಾಡುವವರಿಗೆ ಹೊತ್ತು- ಗೊತ್ತು ಏನಿಲ್ಲ ಎಂಬುವುದಕ್ಕೆ ಈ ಘಟನೆಯೇ ನಿದರ್ಶನ. ಮುಂಜಾನೆ ಜೈಲಿನೊಳಗೆ ಗಾಂಜಾ ಎಸೆದ ಅಸಾಮಿಯನ್ನು KSISF ಸಿಬ್ಬಂದಿ ಬೆನ್ನಟ್ಟಿ ಹಿಡಿಯುವ ಮೂಲಕ ಮಾದರಿಯಾಗಿದ್ದಾರೆ.

ಮೂಲತಃ ಬಂಟ್ವಾಳ ಕೊಳತ್ತಮಜಲು ಕೋಳಕೇರಿ ನಿವಾಸಿ, ಪ್ರಸ್ತುತ ಉರ್ವ ವೆಲ್ನೇಟ್‌ ಮೆಟ್ರೋ ಲೇಡಿಸ್‌ ಹಾಸ್ಟೆಲ್‌ ಸಮೀಪದ ನಿವಾಸಿ ತಿಲಕ್‌ರಾಜ್‌ ಪ್ರಕರಣದ ಆರೋಪಿ.

ಏನಿದು ಪ್ರಕರಣ?

ಜು.2ರಂದು ಮುಂಜಾನೆ 4.20ರ ಸುಮಾರಿಗೆ ಕಾರಾಗೃಹದ ಒಳಗಿರುವ ಅಡುಗೆ ಮನೆ ಪ್ರದೇಶಕ್ಕೆ ಅನುಮಾನಾಸ್ಪದ ವಸ್ತುವನ್ನು ಅಪರಿಚಿತ ವ್ಯಕ್ತಿ ಎಸೆಯುತ್ತಾನೆ. ಇದನ್ನು ಕೆಎಸ್‌ಐಎಸ್‌ಎಫ್‌ RPC ಕಿರಣ್‌ ಗಮನಿಸಿ, ತಕ್ಷಣ ASI ಕಿರಣ್‌ ಅಂಬಿಗರಿಗೆ ಮಾಹಿತಿ ನೀಡಿದ್ದಾರೆ. ಅದರಂತೆ ಆರೋಪಿಯನ್ನು 500 ಮೀಟರ್‌ ದೂರಕ್ಕೆ ಬೆನ್ನಟ್ಟಿಕೊಂಡು ಹೋಗಿ ಆರೋಪಿ ತಿಲಕ್‌ರಾಜ್‌ನನ್ನು ಹಿಡಿದಿದ್ದಾರೆ. ಬಳಿಕ ಉಸ್ತುವಾರಿ ಅಧಿಕಾರಿ ಪೊಲೀಸ್‌ ನಿರೀಕ್ಷಕ ಸುಭಾಷ್‌ ಅವರಿಗೆ ಮಾಹಿತಿ ನೀಡಿದ್ದು, ಅವರು ಬಂದು ವಿಚಾರಣೆ ನಡೆಸಿದಾಗ ಆರೋಪಿ ಸತ್ಯ ಬಾಯ್ಬಿಟ್ಟಿದ್ದಾನೆ.

ಆರೋಪಿಗೆ ಗಾಂಜಾ ನೀಡಿದ್ಯಾರು ?

ಮೂಡುಶೆಡ್ಡೆ ನಿವಾಸಿ ಕಿರಣ್‌ ಎಂಬ ವ್ಯಕ್ತಿ ಆರೋಪಿಗೆ ಗಾಂಜಾ, ಲೈಟರ್‌, ಗಾಂಜಾ ಸೇದುವ ಪೇಪರ್‌ಗಳನ್ನು ಕೊಟ್ಟು ಈ ವಸ್ತುಗಳನ್ನು ಕಾರಾಗೃಹದ ಒಳಗೆ ಎಸೆಯಬೇಕು ಎಂದು ಹೇಳಿ ಈ ಕೃತ್ಯ ಎಸಗಲು 2 ಸಾವಿರ ರೂ.ಗಳನ್ನು ನೀಡಿರುತ್ತಾನೆ. ಇದಾದ ಬಳಿಕ ಕಾರಾಗೃಹದಲ್ಲಿ ಬಂಧಿಯಾಗಿರುವ ಲಾಯ್‌ ವೇಗಸ್‌ ಎಂಬಾತನ ಮೊಬೈಲ್‌ ನಂಬರ್‌ ನೀಡಿದ್ದು, ಆತನ ಸೂಚನೆಯಂತೆ ಅವನು ಹೇಳಿದ ಜಾಗಕ್ಕೆ (ಕಾರಾಗೃಹ ಅಡುಗೆ ಮನೆ) ಮಾದಕ ವಸ್ತುಗಳನ್ನು ಎಸೆದಿರುವುದಾಗಿ ಆರೋಪಿ ಬರ್ಕೆ ಪೊಲೀಸರ ವಿಚಾರಣೆ ವೇಳೆ ತಿಳಿಸಿದ್ದಾನೆ. ಆರೋಪಿಯಿಂದ ಕೃತ್ಯಕ್ಕೆ ಬಳಸಲಾದ ದ್ವಿಚಕ್ರ ವಾಹನ, ಮೊಬೈಲ್‌ ವಶಕ್ಕೆ ಪಡೆಯಲಾಗಿದೆ.

ಜೈಲಿನೊಳಗಿಂದ ಮೊಬೈಲ್‌ ವಶಕ್ಕೆ

ಆರೋಪಿ ತಿಲಕ್‌ರಾಜ್‌ ನೀಡಿದ ಮಾಹಿತಿಯಂತೆ ಜೈಲಿನ ವಿಚಾರಣಾಧೀನ ಕೈದಿ ಲಾಯ್‌ ವೇಗಸ್‌ನನ್ನು ವಿಚಾರಣೆ ನಡೆಸಿದಾಗ ತಾನು ಮೊಬೈಲ್‌ ಬಳಕೆ ಮಾಡಿರುವ ಬಗ್ಗೆ ಒಪ್ಪಿಕೊಂಡಿದ್ದು, ಅದನ್ನು ಕೊಠಡಿಯ ಶೌಚಾಲಯದ ಒಳಗೆ ಇಟ್ಟಿರುವುದಾಗಿ ತಿಳಿಸಿದ್ದಾನೆ. ಅದರಂತೆ ತಪಾಸಣೆ ನಡೆಸಿ ಮೊಬೈಲ್‌ ವಶಕ್ಕೆ ಪಡೆಯಲಾಗಿದೆ.

ಈ ಪ್ರಕರಣದಲ್ಲಿ ಆರೋಪಿಗಳಾದ ತಿಲಕ್‌ರಾಜ್‌ ಮತ್ತು ಲಾಯ್‌ ವೇಗಸ್‌ ವಿರುದ್ಧ ಬರ್ಕೆ ಪೊಲೀಸ್‌ ಠಾಣೆಯಲ್ಲಿ ಎನ್‌ಡಿಪಿಎಸ್‌ ಕಾಯಿದೆಯಡಿ ಮತ್ತು ಕರ್ನಾಟಕ ಕಾರಾಗೃಹಗಳ ತಿದ್ದುಪಡಿ-2022 ಕಾಯಿದೆ 42ರ ಅಡಿಯಲ್ಲಿ ಪ್ರಕರಣ ದಾಖಲಾಗಿದೆ.

ಕಾರ್ಯಾಚರಣೆಗೆ ಕಾರಾಗೃಹ ಅಧೀಕ್ಷಕ ಶರಣ ಬಸಪ್ಪ , ಕೆಎಸ್‌ಐಎಸ್‌ಎಫ್‌ ಪೊಲೀಸ್‌ ಇನ್‌ಸ್ಪೆಕ್ಟರ್‌ ಸುಭಾಷ್‌ ಎಚ್‌.ಎನ್‌. ಹಾಗೂ ಕಾರಗೃಹ ಸಿಬ್ಬಂದಿ ಸಹಕರಿಸಿದ್ದಾರೆ.